ក្រសួង​ពាណិជ្ជកម្ម បាន​បើក​សិក្ខាសាលាផ្សព្វផ្សាយថ្នាក់ជាតិ ស្តីពីយុទ្ធសាស្ត្រសមាហរណកម្មពាណិជ្ជកម្ម ឆ្នាំ ២០១៩-២០២៣ ដែលរៀបចំឡើងនៅសណ្ឋាគារ HIMAWARI នាព្រឹកថ្ងៃទី២១ ខែសីហា ឆ្នាំ២០១៩ ក្រោមអធិបតីភាព លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម។

លោក ប៉ាន សូរស័ក្តិ បាន​ថ្លែងថា ការពង្រឹងភាពប្រកួតប្រជែងរបស់កម្ពុជា ដើម្បីគាំទ្រដល់ការវិវត្តចេញពីប្រទេសអភិវឌ្ឍន៍តិចតួច (LDC) និងការទាញយកផលប្រយោជន៍ពីប្រភពកំណើនថ្មី ជាពិសេសសេវាកម្ម និងបដិវត្តន៍ឧស្សាហកម្មជំនាន់ទី៤ (Industrial Revolution 4.0) គឺជាប្រធានបទដ៏សំខាន់ នៅក្នុងយុទ្ធសាស្ត្រសមាហរណកម្មពាណិជ្ជកម្មកម្ពុជា (CTIS) ឆ្នាំ២០១៩-២០២៣។

លោករដ្ឋមន្រ្តី​បានគូសបញ្ជាក់ថា លក្ខណៈពិសេសនៃ CTIS គឺការតភ្ជាប់វិស័យពាណិជ្ជកម្មទៅនឹងផែនការយុទ្ធសាស្ត្រអភិវឌ្ឍន៍ជាតិ និងកម្មវិធីនយោបាយរបស់រាជរដ្ឋាភិបាលរួមមាន យុទ្ធសាស្ត្រចតុកោណដំណាក់កាលទី៤ ឆ្នាំ២០១៩-២០២៣ និងចក្ខុវិស័យកម្ពុជា ឆ្នាំ២០៣០។

លោកបានបន្ថែមទៀតថា យុទ្ធសាស្ត្រ CTIS ឆ្នាំ២០១៩ មិនមែនជាឯកសារផ្ដាច់មុខរបស់ក្រសួង ពាណិជ្ជកម្ម​ទេ ប៉ុន្តែគឺសម្រាប់អន្តរក្រសួង ដោយសារតែពាណិជ្ជកម្ម គឺជាបញ្ហាអន្តរវិស័យ ដែលទាមទារឱ្យតួអង្គពាក់ព័ន្ធ ចូលរួមសហការអនុវត្តន៍ទាំងអស់គ្នា ទើបអាចសម្រេចនូវគោលដៅនៃយុទ្ធសាស្ត្រនេះបាន។

«ខ្ញុំសង្ឃឹមយ៉ាងមុតមាំថា យុទ្ធសាស្ត្រនេះនឹងផ្ដល់ជូនសកម្មភាពជាគោលនយោបាយច្បាស់លាស់ សម្រាប់តួអង្គពាក់ព័ន្ធទាំងអស់ចូលរួមអនុវត្ត ហើយក៏សូមអំពាវនាវឱ្យសហការជិតស្និត ជាមួយក្រសួងពាណិជ្ជកម្ម ដើម្បីធានាការធ្វើពិពិធកម្មកំណើនសេដ្ឋកិច្ច និងការបង្កើនឧត្តមភាពជូនប្រជាពលរដ្ឋ សំដៅសម្រេចឱ្យបាននូវចក្ខុវិស័យរបស់រាជរដ្ឋាភិបាល និងគោលដៅអភិវឌ្ឍន៍របស់កម្ពុជាប្រកបដោយចីរភាព។»

សូមជម្រាបដែរថា យុទ្ធសាស្ត្រ CTIS ឆ្នាំ២០១៩ គឺជាឯកសារជំនាន់ទី៤ ដែលបានធ្វើបច្ចុប្បន្នភាពដោយក្រសួងពាណិជ្ជកម្ម ហើយត្រូវបានដាក់សម្ពោធឱ្យប្រើប្រាស់ជាផ្លូវការ ដោយសម្តេចតេជោ ហ៊ុន សែន នាយក​រដ្ឋ​មន្រ្តី​នៃកម្ពុជា នៅក្នុងកិច្ចប្រជុំត្រួតពិនិត្យឡើងវិញជាសកលនូវជំនួយសម្រាប់ពាណិជ្ជកម្ម (Aid-for-Trade) នៅក្នុងទីក្រុងហ្សឺណែវ ប្រទេសស្វីស កាលពីថ្ងៃទី០៣ ខែកក្កដា ឆ្នាំ២០១៩ កន្លងទៅ។

យុទ្ធសាស្ត្រថ្មីនេះ ត្រូវបានរៀបចំ និងចែកចេញជា១២ ជំពូក ដែលសុទ្ធសឹងតែជាចំណុចសំខាន់ៗ និងឆ្លុះបញ្ចាំងពីតម្រូវការជាក់ស្ដែងសម្រាប់កម្ពុជា នៅក្នុងបរិបទបច្ចុប្បន្ន មានដូចជា៖

១. គោលនយោបាយពាណិជ្ជកម្ម និងកិច្ចចរចាក្នុងតំបន់

២. ពាណិជ្ជកម្ម ការចាកចេញពីប្រទេស LDC និងគុណភាពនៃកំណើន

៣. ជំនាញ ការអប់រំ និងការបណ្តុះបណ្តាលសម្រាប់កំណើន

៤. កិច្ចសម្រួលពាណិជ្ជកម្ម

៥. ភ័ស្តុភារពាណិជ្ជកម្ម

៦. ការប្រកួតប្រជែង បរិយាកាសធុរកិច្ច ហិរញ្ញវត្ថុពាណិជ្ជកម្ម និងកម្មសិទិ្ធបញ្ញា

៧. ស្តង់ដារ និងរចនាសម្ព័ន្ធគុណភាព

៨. ខ្សែច្រវ៉ាក់តម្លៃនៃកសិឧស្សាហកម្ម សម្រាប់នាំចេញ

៩. ឧស្សាហកម្មធុនស្រាល សម្រាប់ការធ្វើពិពិធកម្មនាំចេញ

១០. ពាណិជ្ជកម្មសេវាកម្ម

១១. ពាណិជ្ជកម្មតាមប្រព័ន្ធអេឡិចត្រូនិក

១២. សេដ្ឋកិច្ចឌីជីថល និងឧស្សាហកម្ម ៤.០។

ចុចអាន៖

• រដ្ឋ​មន្ត្រី​ពាណិជ្ជកម្ម ស្នើ​ឲ្យ​ជប៉ុន​វិនិយោគ ផលិត​គ្រឿង​បង្គំ​កង់ នៅ​កម្ពុជា

• អាណត្តិ ៣ឆ្នាំរបស់​ទូតជប៉ុន៖ ជប៉ុន ចុះកិច្ចព្រមព្រៀង​ផ្តល់ជំនួយ​ឥតសំណង ១៥០លានដុល្លារ ជាមួយ​កម្ពុជា

អត្ថបទ និងរូបភាព៖ ក្រសួងពាណិជ្ជកម្ម