តម្លៃប្រេងក្នុងស្រុក នឹងមិនប្រែប្រួលឡើយ ទោះបានតំណក់ប្រេងលើកដំបូងក៏ដោយ

2017-09-07 09:44:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ម៉េង សក្តិធារ៉ា រដ្ឋលេខាធិការក្រសួងរ៉ែ និងថាមពល បានបញ្ជាក់ថា តំណក់ប្រេងដំបូងរបស់កម្ពុជា ដែលរំពឹងថាផលិតបាន ៣០លានបារ៉ែល នៅរយៈពេល ២ឆ្នាំខាងមុខ នឹងមិនធ្វើឲ្យតម្លៃប្រេងសាំងក្នុងស្រុកមានការប្រែប្រួលនោះឡើយ។ ការលើកឡើងនេះ នៅក្នុងសិក្ខាសាលាស្ដីពី «ដំណើរឆ្ពោះទៅជាប្រទេសផលិតប្រេង» កាលពីថ្ងៃទី៦កញ្ញា។

លោក ម៉េង សក្តិធារ៉ា បាននិយាយថា ការចាប់ផ្តើមផលិតកម្មប្រេងឆៅរបស់កម្ពុជា នៅប្លុក A មិនមានទាក់ទងជាមួយនឹងថ្លៃប្រេង ដែលប្រជាជនប្រើប្រាស់សព្វថ្ងៃនោះទេ។ កម្ពុជាបានផ្ដល់សិទ្ធិឲ្យក្រុមហ៊ុនសិង្ហបុរីផលិតប្រេងឆៅ តែប្រេងឆៅទាំងនោះនឹងត្រូវនាំចេញទៅទីផ្សារអន្តរជាតិ ខណៈដែលកម្ពុជាមិនទាន់អភិវឌ្ឍរោងចក្រចម្រាញ់ប្រេងបាននៅឡើយ។

ទីតាំងបូមប្រេង១កន្លែងរបស់ក្រុមហ៊ុន Kris Energy

លោកបន្ថែមថា កម្ពុជាក៏មានក្រុមហ៊ុននាំចូលប្រេងឆៅដើម្បីចម្រាញ់ជាប្រេងដែលប្រើប្រាស់រាល់ថ្ងៃដែរ តែមិនទាន់អាចយកប្រេងឆៅដែលកម្ពុជាផលិតដំបូងនេះបានឡើយ ដោយសារការអភិវឌ្ឍនៅប្លុក A នៅមានភាពមិនច្បាស់លាស់មួយចំនួន ដែលមិនអាចធានាគោលដៅនិរន្តភាពសម្រាប់ផ្គត់ផ្គង់ទីផ្សារធំៗបានឡើយ។ ទោះជាយ៉ាងណា កម្ពុជានៅតែរំពឹងថា នឹងអាចយកប្រេងឆៅដែលចម្រាញ់ជាប្រេងសម្រាប់ប្រជាពលរដ្ឋប្រើប្រាស់នៅពេលខាងមុខ។

សូមបញ្ជាក់ថា កាលពីថ្ងៃទី២៣ សីហា កម្ពុជា បានចុះកិច្ចព្រមព្រៀងជាមួយក្រុមហ៊ុន Kris Energy ក្នុងការអភិវឌ្ឍប្រេងនៅប្លុក A។ លោក Kelvin Tang ប្រធានក្រុមហ៊ុន បាននិយាយថា កម្ពុជានឹងទទួលបានចំណូលចំនួន ៥០០លានដុល្លារបន្ថែម ពីកិច្ចព្រមព្រៀងសម្រាប់ការអភិវឌ្ឍអណ្តូងប្រេងកាតនេះ។ ការប៉ាន់ប្រមាណនេះ គឺសម្រាប់រយៈពេលមួយអាយុកាលរបស់គម្រោងទាំងមូល ដែលសំដៅទៅលើ ចំណូលបានពីពន្ធដារគ្រប់ប្រភេទ ថ្លៃសេវាផ្សេងៗ និងកម្រៃជើងសារ៕