វៀតណាម ជាអតិថិជនតែ១គត់ ដែលទិញគ្រាប់ស្វាយចន្ទី ពីកម្ពុជា

2017-11-29 03:25:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានសមាគមស្វាយចន្ទីវៀតណាម លោក Nguyen Duc Thanh បាននិយាយថា ក្រុមហ៊ុនស្វាយចន្ទីវៀតណាមបានប្រមូលទិញគ្រាប់ស្វាយចន្ទីពីកម្ពុជាប្រមាណ ១០ម៉ឺនតោន ខណៈដែលកម្ពុជាមានសមត្ថភាពផលិតបាន ១០,៤២ម៉ឺនតោន នៅក្នុងឆ្នាំ២០១៦ ដោយអាចចាត់ទុកបានថា វៀតណាមជាអតិថិជនទិញស្វាយចន្ទីតែមួយគត់របស់កម្ពុជា។ លោកលើកឡើងដូច្នេះ ក្នុងជំនួបជាមួយលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃទី២៨ ខែវិច្ឆិកា នៅទីស្តីការក្រសួងកសិកម្ម។

លោក Nguyen Duc Thanh ប្រធានសមាគមស្វាយចន្ទីវៀតណាម (រូបថត៖ ក្រសួងកសិកម្ម)

លោក Nguyen Duc Thanh អះអាងថាសមាគមស្វាយចន្ទីវៀតណាម អាចចាត់ទុកបានថាជាក្រុមហ៊ុននាំចេញគ្រាប់ស្វាយចន្ទីធំជាងគេនៅលើពិភពលោកនៅក្នុងឆ្នាំ២០១៧នេះ ដោយក្រុមហ៊ុនបាននាំចេញគ្រាប់ស្វាយចន្ទីកែច្នៃចំនួន ១,៦លានតោន ទន្ទឹមនឹងតម្រូវការពិភពលោកមានចំនួន ៣លានតោន។

លោកបានបន្តថា សមាគមនឹងចុះទៅតាមខេត្តចំនួន២គឺ ខេត្តកំពង់ធំ និងខេត្តក្រចេះ ដើម្បីពិភាក្សាពីពូជ និងសារធាតុនៅក្នុងស្វាយចន្ទី ដែលមានការពេញនិយមនៅលើទីផ្សារអន្តរជាតិ និងផ្សព្វផ្សាយពីបច្ចេកទេសនៃការប្រមូលផល ដើម្បីកាត់បន្ថយការខាតបង់របស់កសិករ។

សមាគមស្វាយចន្ទីវៀតណាមបានស្នើឲ្យក្រសួងកសិកម្ម រៀបចំចងក្រងសមាគមស្វាយចន្ទីកម្ពុជា ដើម្បីងាយស្រួលទំនាក់ទំនង។ ទន្ទឹមនឹងនេះសមាគមក៏បានស្នើឲ្យក្រសួងកសិកម្ម ជួយអន្តរាគមដល់ការផ្តល់វិញ្ញាបនបត្រប្រភពទំនិញ (CO) នៅនឹងខេត្តច្រកនាំចេញ និងស្នើឲ្យសម្រួលដល់សោហ៊ុយនៃការដឹកជញ្ជូនឆ្លងដែនកម្ពុជា-វៀតណាម។ លោកប្រធានសមាគម ក៏បានប្តេជ្ញាបង្កើនការទិញគ្រាប់ស្វាយចន្ទីពីកម្ពុជាទាំងអស់តែម្តង។

លោក វេង សាខុន សង្ឃឹមថាកម្ពុជានឹងអាចបង្កើនការនាំចេញគ្រាប់ស្វាយចន្ទីឲ្យបាន ១លានតោន នាពេលខាងមុខ។ ចំពោះសំណើរបស់សមាគមពាក់ព័ន្ធនឹងការផ្តល់ CO គឺក្រសួងពាណិជ្ជកម្មបានផ្ទេរការចេញវិញ្ញាបនបត្រទៅកាន់មូលដ្ឋានរួចរាល់ហើយ ដោយក្រសួងនឹងសហការជាមួយក្រសួងពាក់ព័ន្ធដើម្បីពិនិត្យ និងដោះស្រាយជូននូវបញ្ហាពាក់ព័ន្ធមួយចំនួនទៀត៕