ស្ពានជ្រោយចង្វារចាស់ ដំណើរការជួសជុលបានប៉ុន្មានភាគរយហើយ?

2018-04-10 13:45:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសាធារណៈការនិងដឹកជញ្ជូន បានបញ្ជាក់ថា ការងារជួសជុល និងសាងសង់ឡើងវិញនៃស្ពានជ្រោយចង្វារចាស់ ឬស្ពានមិត្តភាពកម្ពុជា-ជប៉ុន សម្រេចបាន ២៧ភាគរយហើយ គិតត្រឹមចុងខែមីនា ឆ្នាំ២០១៨។

សូមបញ្ជាក់ថា ការជួសជុលនេះ ប្រើពេល ២៤ខែ ពោលគឺគ្រោងនឹងបញ្ចប់នៅចុងឆ្នាំ ២០១៩។ ទឹកប្រាក់ត្រូវចំណាយលើការជួសជុល មានប្រមាណ ៣០លានដុល្លារ ដោយស្ថិតក្រោមជំនួយឥតសំណងរបស់រដ្ឋាភិបាលជប៉ុន តាមរយៈទីភ្នាក់ងារប្រតិបត្តិការអន្តរជាតិជប៉ុន (JICA)។

ស្ពានជ្រោយចង្វារចាស់ (ឆ្វេង) ត្រូវបិទចរាចរណ៍ អំឡុងពេលជួសជុល (រូបភាព៖ ក្រសួងសាធារណការ និងដឹកជញ្ជូន)

ការជួសជុលស្ពានជ្រោយចង្វារដែលមានប្រវែងជិត១០០០ម៉ែត្រនេះ ត្រូវចែកចេញជា ៣ ផ្នែកសំខាន់ៗផ្សេងគ្នា។ ក្នុងនោះ ផ្នែកទី ១ គម្រោងជួសជុលចុងស្ពាន និងផ្លូវថ្នល់ ទាំងសងខាងមានប្រវែង ២៥៨ម៉ែត្រ និងផ្នែកទី ២ ជាគម្រោងជួសជុលគល់ស្ពានប្រវែង ១៦៨ ម៉ែត្រ។ ចំណែកឯផ្នែកដ៏សំខាន់នោះ គឺតួស្ពានមានប្រវែង ៥៤៥ ម៉ែត្រ។

សូមបញ្ជាក់ថា នេះជាលើកទី២ ហើយដែលស្ពាននេះត្រូវបានជួសជុល។ ស្ពានជ្រោយចង្វារ បានសាងសង់ឡើងក្នុងឆ្នាំ ១៩៦៦ នាសម័យសង្គមរាស្ត្រនិយម។ ស្ពាននេះត្រូវបានទាហានខ្មែរក្រហម ដាក់មីនបំផ្ទុះកាត់ផ្តាច់នៅចំណុចពាក់កណ្តាលស្ពាន កាលពីសម័យសង្គ្រាមឆ្នាំ ១៩៧៣។ លុះដល់ឆ្នាំ ១៩៩២ រដ្ឋាភិបាលជប៉ុន បានផ្តល់ថវិកា និងបច្ចេកទេសក្នុងលក្ខខណ្ឌជំនួយឥតសំណង ដើម្បីធ្វើការជួយជួសជុលតភ្ជាប់ស្ពាននេះឡើងវិញ និងត្រូវបានបើកសម្ភោធដាក់ឲ្យដំណើរការជាថ្មីនៅឆ្នាំ ១៩៩៥។ ការជួសជុលលើកទី២ នាពេលនេះ បានចាប់ផ្ដើមកាលពីខែតុលា ឆ្នាំ២០១៧៕

ទស្សនាវីដេអូជួសជុលស្ពានជ្រោយចង្វារចាស់៖

ទស្សនាទិដ្ឋភាពមួយចំនួន នៃការជួសជុលស្ពានជ្រោយចង្វារចាស់ ដូចខាងក្រោម៖