បុត្រច្បងសម្តេចក្រុមព្រះ នឹងបង្ហាញខ្លួនជាលើកដំបូង ក្នុងវេទិកាជាមួយរាជរដ្ឋាភិបាល

2018-08-19 02:56:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ព្រះអង្គម្ចាស់ នរោត្តម ចក្រាវុឌ្ឍ ព្រះរាជបុត្រាច្បងរបស់សម្តេចក្រុមព្រះ នរោត្ដម រណឫទ្ធិ និងជាប្រធានស្តីទីគណបក្សហ៊្វុនស៊ិនប៉ិច និងសហជីវិន ពេជ្រ សុជេថ្ថា អគ្គលេខាធិការប្រតិបត្តិគណបក្សហ៊្វុនស៊ិនប៉ិច នឹងបង្ហាញខ្លួនជាលើកដំបូង នៅក្នុងវេទិកាពិគ្រោះយោបល់ជាមួយរាជរដ្ឋាភិបាល នៅថ្ងៃទី២១ ខែសីហា ឆ្នាំ២០១៨ខាងមុខនេះ នៅវិមានសន្តិភាព។ នេះបើតាមលោក ណុប សុធារិទ្ធ អ្នកនាំពាក្យគណបក្សហ៊្វុនស៊ិនប៉ិច បានបញ្ជាក់ប្រាប់ [ខ្លីៗ] នៅព្រឹកថ្ងៃទី១៩សីហានេះ។

ព្រះអង្គម្ចាស់ នរោត្តម ចក្រាវុឌ្ឍ ព្រះរាជបុត្រាច្បងរបស់សម្តេចក្រុមព្រះ នរោត្ដម រណឫទ្ធិ

ការបង្ហាញខ្លួននេះ ក្រោយពេលដែលព្រះអង្គម្ចាស់ នរោត្តម ចក្រាវុឌ្ឍ និងសហជីវិន ពេជ្រ សុជេថ្ថា ត្រូវបានសម្តេចក្រុមព្រះ ប្រធានគណបក្សហ៊្វុនស៊ិនប៉ិច សម្រេចតែងតាំងក្នុងមុខតំណែងខាងលើនេះ កាលពីថ្ងៃទី៨ ខែសីហាកន្លងទៅ។

ព្រះអង្គម្ចាស់ នរោត្តម ចក្រាវុឌ្ឍ មានភារកិច្ចដឹកនាំ ចាត់ចែង សម្រេចរាល់ការងារគណបក្ស នៅពេលអវត្តមានសម្តេចក្រុមព្រះ ក្នុងពេលសម្រាកព្យាបាលជំងឺ។ ចំណែក សហជីវិន ពេជ្រ សុជេថ្ថា មានភារកិច្ចដឹកនាំ ចាត់ចែង សម្រេចរាល់ការងាររបស់អគ្គលេខាធិការដ្ឋានគណបក្សហ៊្វុនស៊ិចប៉ិច។

កាលពីថ្ងៃទី១៦សីហាកន្លងទៅ ទីស្តីការគណៈរដ្ឋមន្រ្តី បានផ្ញើលិខិតអញ្ជើញទៅគណបក្សទាំង១៩ ដែលមិនទទួលបានអាសនៈក្នុងរដ្ឋសភា ឱ្យចូលរួមក្នុងវេទិកាពិគ្រោះយោបល់ជាមួយរាជរដ្ឋាភិបាល។ វេទិកានេះ នឹងពិភាក្សាលើរបៀបវារៈដូចខាងក្រោម៖

១. សុន្ទរកថាបើកវេទិកាដោយសម្តេចនាយករដ្ឋមន្រ្តី ហ៊ុន សែន

២. ការចូលរួមយោបល់ពីគណបក្សនយោបាយនានា

៣. បញ្ហាផ្សេងៗ

៤. ពិសាបាយសាមគ្គី៕

អត្ថបទទាក់ទង៖

អត្ថបទ៖ សំភី