ទូត EU សោកស្តាយចំពោះការសម្រេចចិត្តដកការអនុគ្រោះពន្ធលើអង្ករកម្ពុជា

2019-03-12 02:09:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា ដែលជិតចប់អាណត្តិ បានបង្ហាញការសោកស្តាយចំពោះការសម្រេចចិត្តរបស់សហគមន៍អឺរ៉ុប ក្នុងការដកការអនុគ្រោះពន្ធលើអង្ករកម្ពុជា។ ការថ្លែងនេះ ធ្វើឡើងក្នុងជំនួបដើម្បីជម្រាបលាលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១១ ខែមីនា ឆ្នាំ២០១៩ នៅទីស្តីការក្រសួង។

លោក George Edgar ថ្លែងនាពេលកន្លងមក

តែទោះជាយ៉ាងណា លោក George Edgar បញ្ជាក់ថា ការសម្រេចចិត្តនេះ គឺដើម្បីជួយដល់កសិករនៅអឺរ៉ុប ក្នុងការបង្កើនលទ្ធភាពក្នុងការប្រកួតប្រជែងនៅក្នុងទីផ្សារអឺរ៉ុប។

សូមបញ្ជាក់ថា កិច្ចប្រជុំនេះ បានផ្តោតជាសំខាន់លើការបង្កើនកិច្ចសហប្រតិបត្តិការថែមមួយកម្រិតទៀតរវាងក្រសួងកសិកម្ម និងសហគមន៍អឺរ៉ុបលើការអភិវឌ្ឍ និងអភិរក្សអនុវិស័យជលផល និងអនុវិស័យព្រៃឈើ។ ចំពោះអនុវិស័យផលិតកម្មសត្វ និងសុខភាពសត្វ ភាគីទាំងពីរ បានឯកភាពក្នុងការរៀបចំគម្រោងស្នើសុំការគាំទ្រទៅសហគមន៍អឺរ៉ុប ដែលគោលដៅចំបងនៃគម្រោងនេះ គឺដើម្បីលើកកម្ពស់ និងជំរុញការបង្កាត់ពូជសប្បនិម្មិតពូជគោដែលកំពុងមានសក្តានុពលលើទីផ្សារ ហើយក៏ជាប្រភពចំណូលដ៏ខ្ពស់សម្រាប់ប្រជាកសិករនៅមូលដ្ឋាន។

សូមរំលឹកថា កាលពីខែមករា ឆ្នាំ២០១៩ សហភាពអឺរ៉ុប បានចាប់ផ្តើមគិតពន្ធលើអង្ករកម្ពុជា ចំនួន៤ប្រភេទ ដែលនឹងធ្វើឱ្យកម្ពុជា ខាតបង់លើការបង់ពន្ធនេះ ប្រមាណ ៥០លានដុល្លារក្នុង១ឆ្នាំ។ EU បានសម្រេចកំណត់ពន្ធតម្លៃ ១៧៥អឺរ៉ូ ក្នុងអង្ករ១តោននៅឆ្នាំដំបូង បន្ទាប់មកអត្រាដកហូតពន្ធគយនឹងធ្លាក់ចុះដល់ចំនួន ១៥០អឺរ៉ូនៅឆ្នាំទីពីរ ហើយនៅឆ្នាំទី៣ អត្រាពន្ធគយលើអង្ករនាំចូលពីកម្ពុជា នឹងធ្លាក់ចុះមកនៅត្រឹម១២៥អឺរ៉ូ ហើយនៅឆ្នាំបន្តបន្ទាប់តម្លៃនឹងធ្លាក់ចុះបន្ថែមផងដែរ។

កាលពីឆ្នាំ២០១៨កន្លងទៅ អង្ករកម្ពុជាជិត ២៧ម៉ឺនតោន ត្រូវបាននាំចូលទៅកាន់ទីផ្សារសហគមន៍អឺរ៉ុប ដែលធ្វើឱ្យអឺរ៉ុបក្លាយជាទីផ្សារធំបំផុត សម្រាប់អង្ករកម្ពុជា ដែលមានចំណែកទីផ្សាររហូតដល់ទៅជាង ៤៣ភាគរយនៃតួលេខអង្ករកម្ពុជានាំចេញទៅទីផ្សារអន្តរជាតិ៕

អត្ថបទទាក់ទង៖

អត្ថបទ៖ សំភី