ក្រុមតាលីបង់ ត្រូវបាន​សារព័ត៌មាន​ The Washington Post រាយការណ៍​ថា កាលពីឆ្នាំ២០២០ បាន​ស៊ូកប៉ាន់​មន្រ្តី និងយោធារបស់​រដ្ឋាភិបាល​អាហ្វហ្គានីស្ថាន ដើម្បីឱ្យពួកគេ​ចុះចាញ់ ឬទម្លាក់អាវុធចុះ។

សារព័ត៌មាន​នេះ បាន​ដកស្រង់​សម្តីមន្រ្តី​អាហ្វហ្គានីស្ថានម្នាក់ថា ពេលនោះ​មន្រ្តី​មួយចំនួន​បានទទួលយកលុយ ហើយ​អ្នកខ្លះ​ត្រូវគេគំរាមថា ក្រុមតាលីបង់​នឹង​កាន់កាប់អំណាច​នៅពេល​ដែលអាមេរិកដកទ័ព ហើយបើព្រមចុះចាញ់មុន គឺ​នឹង​ទទួលបាន​ការអនុគ្រោះ។

ក្រោយការដកទ័ពរបស់​អាមេរិក ក្រុមតាលីបង់ ​បានទទួលជ័យជម្នះ​ដោយវាយលុកចូល​រដ្ឋធានីកាប៊ុល ប្រទេសអាហ្វហ្គានីស្ថាន និងចូលកាន់កាប់​វិមាន​ប្រធានាធិបតី នៅថ្ងៃទី១៥ សីហា ២០២១។

អ្នកនាំពាក្យ​ក្រុមតាលីបង់ អះអាងថា ជ័យជម្នះរបស់ខ្លួន​នេះ គឺ​បាន​បញ្ចប់​សង្គ្រាមស៊ីវិលក្នុងប្រទេសអាហ្វហ្គានីស្ថាន ដែលមានរយៈពេល ២០ឆ្នាំកន្លងមក៕