បន្ទាប់ពី​ក្រុមតាលីបង់ បាន​កាន់កាប់​ប្រទេសអាហ្វហ្គានីស្ថានទាំងស្រុង បណ្តាទូត និង​ពលរដ្ឋ​ប្រទេសលោកខាងលិច ត្រូវបានដកចេញពីក្រុងកាប៊ុល ហើយនៅសេសសល់ស្ថានទូតតែប៉ុន្មានប៉ុណ្ណោះ ក្នុងនោះ​គឺ​មានស្ថានទូតប្រទេសចិន ដែល​នៅតែ​បន្តកិច្ចសហប្រតិបត្តិការ។

គួរកត់សម្គាល់ដែរថា មុន​វាយឈ្នះ​កងទ័ពរដ្ឋាភិបាល​អាហ្វហ្គានីស្ថាន​ចូលកាន់កាប់​ក្រុងកាប៊ុល នៅថ្ងៃទី១៥សីហា ពោលគឺ​កាលពី​ថ្ងៃទី២៨ កក្កដា មេដឹកនាំ​តាលីបង់ លោក Mullah Abdul Ghani Baradar បាន​ជួបជាមួយ​លោក វ៉ាង យី រដ្ឋមន្រ្តី​ការបរទេសចិន នៅ​ក្រុងធានជីង ប្រទេសចិន ដែល​បង្ហាញពី​ទំនាក់ទំនង​ដ៏ល្អ​រវាងភាគីទាំងពីរ។

ក្នុង​ជំនួបពិភាក្សា​នោះ លោក វ៉ាង យី បានលើកឡើង​ថា ក្រុមតាលីបង់គឺ​ជាយោធា និងកម្លាំងនយោបាយ​ដ៏សំខាន់មួយ​ក្នុងប្រទេសអាហ្វហ្គានីស្ថាន ហើយ​លោករំពឹងថា ក្រុមតាលីបង់​នឹង​ដើរតួនាទី​ដ៏សំខាន់​ក្នុងដំណើរការសន្តិភាព ផ្សះផ្សារជាតិ និងការកសាងប្រទេសឡើងវិញ។

គួរដឹងថា ជំនួបនេះគឺធ្វើឡើង​បន្ទាប់ពី​អាមេរិក ដកទ័ព​ចេញពី​អាហ្វហ្គានីស្ថាន។

កាលពីថ្ងៃទី១៦សីហាម្សិលមិញនេះ អ្នកនាំពាក្យ​ក្រសួង​ការបរទេសចិន លោកស្រី Hua Chunying ថ្លែងថា ក្រុងប៉េកាំង​គោរព​សិទ្ធិសេរីភាព​របស់​ប្រជាជន​អាហ្វហ្គានីស្ថាន ដើម្បី​កំណត់ជោគវាសនារបស់ខ្លួន ហើយ​រដ្ឋាភិបាលចិនសង្ឃឹមថា នឹងថែរក្សាទំនាក់ទំនង​ដ៏ល្អជាមួយ​អាហ្វហ្គានីស្ថាន។

លោកស្រីបន្តថា ក្រុមតាលីបង់​វិញ​ក៏បានបញ្ជាក់ក្តីសង្ឃឹម​ ក្នុងការ​បង្កើត​ទំនាក់ទំនង​ល្អជាមួយចិនផងដែរ និង​ស្វែងរកការចូលរួមរបស់ចិន ក្នុងការ​កសាង និងអភិវឌ្ឍ​ប្រទេស​អាហ្វហ្គានីស្ថាន៕