តំបន់ពីរនៅជាយរាជធានីភ្នំពេញ កំពុងប្រជែងសក្តានុពលវិនិយោគវិស័យអចលនទ្រព្យ

2018-01-29 02:18:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ស្ថានភាពនៃទីផ្សារអចលនទ្រព្យនៅកម្ពុជា នៅតែបន្តមានភាពល្អប្រសើរ បើទោះបីជាមានការព្រួយបារម្ភតិចតួចទាក់ទិននឹងការបោះឆ្នោតថ្នាក់ជាតិនាពេលខាងមុខក្តី។ សុខភាពនៃទីផ្សារអចលនទ្រព្យ គេឃើញមានសន្ទុះកំណើនខ្លាំងក្លា ជាពិសេសនៅរាជធានីភ្នំពេញ ខណៈដែលតំបន់ពីរកំពុងប្រជែងសក្តានុពលវិនិយោគលើវិស័យទីផ្សារមួយនេះ។

ប៉ែកខាងជើង និងប៉ែកខាងត្បូង នៃរាជធានីភ្នំពេញ កំពុងស្ថិតនៅក្រោមការទាញចំណាប់អារម្មណ៍របស់វិនិយោគិនទាំងក្នុង និងក្រៅស្រុក ស្របពេលដែលតំបន់ទាំងពីរនេះមានគម្រោងធំៗជាច្រើនត្រៀមនឹងលេចរូបរាងឡើងនាពេលខាងមុខ។

បើនិយាយពីប៉ែកខាងជើង នៃរាជធានីភ្នំពេញ គម្រោងគ្រាក់ៗជាច្រើនកំពុងលេចរូបរាងជាបណ្តើរៗ។ តួយ៉ាងដូចជាផ្សារម៉ាក្រូ ទំនើបអ៊ីអនម៉លទី២ គម្រោងផ្ទះល្វែងសម្រាប់អាជីវកម្ម គម្រោងមជ្ឈមណ្ឌលសន្និបាតសែនសុខ របស់ក្រុមហ៊ុនលោកឧញ៉ា លី យ៉ុងផាត់ ព្រមទាំងគម្រោងបុរីផ្សេងៗទៀត។

ផ្សារម៉ាក្រូ នៅខណ្ឌសែនសុខ

ដោយឡែក បើក្រឡេកមើលភាគត្បូងវិញ ក៏មានគម្រោងផ្សារទំនើបខ្នាតអន្តរជាតិដែរ ពោលគឺផ្សារទំនើប PH Eco Mall ដែលទើបត្រូវបានបើកការដ្ឋានសាងសង់កាលពីពេលថ្មីៗនេះ ក្រោមទុនវិនិយោគជាង ២០០ លានដុល្លារអាមេរិក របស់ក្រុមហ៊ុន បុរី ប៉េង ហួត គ្រុប ស្ថិតនៅតាមបណ្តោយផ្លូវជាតិលេខ១។ មិនតែប៉ុណ្ណោះ គម្រោងសាងសង់អាកាសយាន្តដ្ឋានថ្មីលំដាប់ពិភពលោកតម្លៃជាង ១,៥ពាន់លានដុល្លារអាមេរិក ដែលទើបត្រូវបានប្រកាសកន្លងទៅថ្មីៗនេះ ក៏ស្ថិតនៅភាគខាងត្បូងនៃរាជធានីភ្នំពេញដែរ។

ផ្សារ PH Eco Mall នៅបុរីប៉េងហួត ផ្លូវជាតិលេខ១

លោកបណ្ឌិត គីម ហ៊ាង ប្រធានសមាគមអ្នកវាយតម្លៃអចលនវត្ថុកម្ពុជា (CVEA) បានលើកឡើងថា ពីមុនដីនៅតំបន់គម្រោងសាងសង់អាកាសយាន្តដ្ឋានថ្មីនេះ ធ្លាប់ជាដីប្រកាសលក់ថោកៗ ហើយស្ទើរតែគ្មានអ្នកទិញផង ប៉ុន្តែឥឡូវនេះមានអ្នកទៅទិញដូចបុណ្យកឋិន។

លោកបណ្ឌិត គីម ហ៊ាង ប្រធានសមាគមអ្នកវាយតម្លៃអចលនវត្ថុកម្ពុជា

យ៉ាងណាមិញ អគ្គនាយកក្រុមហ៊ុន Cambodia Angkor Real Estate លោក ពីង សេរី យល់ឃើញថា ភាគជើងនៃរាជធានីភ្នំពេញនាពេលបច្ចុប្បន្នកំពុងធ្វើដំណើរយ៉ាងលឿនក្នុងការអភិវឌ្ឍន៍លើវិស័យអចលនទ្រព្យ ជាពិសេសនៅខណ្ឌសុខ និងតំបន់បឹងតាមោក ស្ថិតក្នុងខណ្ឌព្រែកព្នៅ។ អ្នកជំនាញរកស៊ីក្នុងវិស័យអចលចនទ្រព្យចាស់វស្សារូបនេះ បានបង្ហើបប្រាប់ឲ្យដឹងថា ទៅថ្ងៃអនាគតតំបន់បឹងតាមោកអាចនឹងក្លាយជាតំបន់ពាណិជ្ជកម្មដ៏ថ្មីសន្លាងមួយទៀត ស្របពេលដែលបច្ចុប្បន្ននេះវិនិយោគិន កូរ៉េ និងជប៉ុនបាននាំគ្នាសម្រុកទិញដីនៅតំបន់នោះទុក។

អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានប្រាប់អ្នកសារពត៌មានថា កាលណាមានប្រជាពលរដ្ឋច្រើន សេដ្ឋកិច្ចក៏ត្រូវតែដើរទៅតាមតម្រូវការជាក់ស្តែង ឬសក្តានុពលទៅតាមតំបន់នីមួយៗ ដោយឆ្លុះបញ្ចាំងតាមរយៈសំណង់បុរី ផ្ទះល្វែង និងគម្រោងសំណង់នានាជាច្រើនទៀត ។

ផ្សារអ៊ីអន ២ កំពុងសាងសង់នៅខណ្ឌសែនសុខ

លោកបានបញ្ជាក់ថា ខណ្ឌមួយទៅខណ្ឌមួយមិនអាចត្រូវបានធៀបគ្នាទេ ដោយសារតែកត្តាភូមិសាស្ត្រ មានលក្ខណៈខុសគ្នា ដូចជាខណ្ឌទួលគោក ជាខណ្ឌមួយដែលរាប់បញ្ចូលខណ្ឌទាំង៤ នៅក្នុងក្រុង រួមមានខណ្ឌដូនពេញ ខណ្ឌចំការមន និងខណ្ឌ៧មករា ដែលនៅក្នុងខណ្ឌទាំង៤នេះ មានសំណង់ និងសក្តានុពលសេដ្ឋកិច្ចរីកចម្រើន និងការផ្លាស់ប្តូរច្រើនជាបន្តបន្ទាប់។

លោក ឃាង ពុទ្ធី អគ្គនាយកក្រុមហ៊ុន ស្លឹករឹត រៀលធី បានថ្លែងប្រាប់ខ្លីៗឲ្យដឹងថា សម្រាប់ការវិនិយោគក្នុងរយៈពេលខ្លី ពោលគឺពី ២ទៅ៣ឆ្នាំទៀត អ្នកជំនាញរូបនេះផ្តល់យោបល់ឲ្យសម្លឹងមើលទៅភាគខាងជើង ដូចជាតំបន់ជិតព្រលានយន្តហោះចាស់ តំបន់ជិតផ្សារទំនើបអ៊ីអនទី២ និងតំបន់ផ្លូវហាណូយជាដើម សុទ្ធតែមានសក្តានុពលលើការវិនិយោគ។ ក៏ប៉ុន្តែប្រសិនបើ ៣ ទៅ ៦ រឺ៧ ឆ្នាំខាងមុខទៀតលោកពុទ្ធីណែនាំឲ្យសម្លឹងមើលទៅតំបន់នៅជិតៗគម្រោងព្រលានយន្តហោះថ្មី៕

ចុចអានអត្ថបទទាក់ទង៖

អត្ថបទ៖ សិរីឧត្តម