ផ្លូវជាតិលេខ៤៨ ទៅកោះកុង មានការខូចខាតទៅដល់ ៩១កំណាត់

2018-10-14 03:26:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងឱ្យដឹងថា ផ្លូវជាតិលេខ៤៨ ពីស្រែអំបិល ទៅកោះកុង មានការខូចខាតប្រវែង ៦៣គីឡូម៉ែត្រ ដោយខូចជាកំណាត់ៗចំនួន ៩១កំណាត់ ក្នុងប្រវែងផ្លូវសរុបជាង ១៥០គីឡូម៉ែត្រ។ ការថ្លែងនេះ ធ្វើឡើងក្នុងអំឡុងពេលលោកចុះត្រួតពិនិត្យការដ្ឋានជួសជុលផ្លូវជាតិលេខ៤៨ នាព្រឹកថ្ងៃទី១៤ ខែតុលា ឆ្នាំ២០១៨នេះ។

លោករដ្ឋមន្រ្តីបញ្ជាក់ថា ដើម្បីជួសជុលផ្លូវនេះ ឱ្យរួចរាល់ទាន់បុណ្យសមុទ្រនៅខេត្តកោះកុង ដែលនឹងប្រារព្ធធ្វើឡើងនាពាក់កណ្តាលខែធ្នូខាងមុខ ក្រុមការងារជួសជុលត្រូវបានបែងចែកជា ៣កងធំៗ។ ក្នុងនោះ២កង ដាក់ដោយក្រសួងសាធារណការ និង១កងទៀត ដាក់ដោយកងវិស្វកម្ម ជាមួយនឹងគ្រឿងចក្រ ១១៤គ្រឿង ដោយធ្វើទាំងយប់ទាំងថ្ងៃ។

ផ្លូវជាតិលេខ៤៨ ថតពីលើអាកាស នៅព្រឹកថ្ងៃទី១៤តុលា ២០១៨។ រូបថត៖ FB ក្រសួងសាធារណការ

ការជួសជុលផ្លូវជាតិលេខ៤៨នេះ នឹងត្រូវធ្វើឱ្យបានជាប់រឹងមាំ និងថែទាំរយៈពេលយ៉ាងតិច ២ឆ្នាំ ដោយសារតែផ្លូវនេះ នឹងត្រូវលើកកម្ពស់គុណភាពទៅជាប្រភេទបេតុងកៅស៊ូ (AC) ក្រោមកម្ចីរបស់កូរ៉េ។ ការចាប់ផ្តើមសាងសង់លើកកម្រិតគុណភាពផ្លូវនេះ នឹងធ្វើឡើងនៅឆ្នាំ២០២០ ដោយក្រុមហ៊ុនកូរ៉េ។ នេះបើតាមលោក ស៊ុន ចាន់ថុល បានឱ្យដឹងបន្ថែម៕

អត្ថបទទាក់ទង៖

អត្ថបទ៖ សំភី