រោងចក្រ iPhone ទី២ គ្រោងផ្លាស់ទៅវៀតណាម ក្រោយ Foxconn បានសិទ្ធិប្រើប្រាស់ដី
- 2019-01-28 07:00:19
- ចំនួនមតិ 0 | ចំនួនចែករំលែក 0
រោងចក្រ iPhone ទី២ គ្រោងផ្លាស់ទៅវៀតណាម ក្រោយ Foxconn បានសិទ្ធិប្រើប្រាស់ដី
ចន្លោះមិនឃើញ
Foxconn ដែលជាក្រុមហ៊ុនដំឡើង iPhone ធំបំផុតមួយនៅលើពិភពលោក បានប្រកាសថា ខ្លួនទទួលបានសិទ្ធិប្រើប្រាស់ដី សម្រាប់គម្រោងសាងសង់រោងចក្រថ្មី នៅក្នុងប្រទេសវៀតណាមហើយ។ បន្ទាប់ពី Foxconn ប្រកាសផ្លាស់ប្ដូររោងចក្រ ពី ចិនទៅកាន់វៀតណាមរួចមក ក្រុមហ៊ុន Pegatron គឺជាក្រុមហ៊ុនដំឡើង iPhone ទី២ ដែលបានប្រកាសកាលពីថ្ងៃទី២៧ ខែមករា ឆ្នាំ២០១៩ ពីគម្រោងសាងសង់រោងចក្រថ្មីនៅ វៀតណាម។
Pegatron មានចំណែកជាង ៣០% នៃការដំឡើង iPhone ឲ្យក្រុមហ៊ុនផ្លែប៉ោមអាមេរិក Apple ។
បើតាមប្រភពចុះផ្សាយ លោក SJ Liao ប្រធានក្រុមហ៊ុន Pegatron បានបញ្ជាក់ថា ក្រុមហ៊ុនរបស់លោកនឹងប្រកាសពីសេចក្ដីលម្អិត នូវគម្រោងនៅក្នុងប្រទេសវៀតណាម ក្នុងពេលឆាប់ៗខាងមុខ។ លោកបន្តថា ការពង្រីកខ្លួនរបស់ Pegatron នៅក្រៅប្រទេសចិន លឿនឬឆាប់ គឺអាស្រ័យលើការវិវឌ្ឍបន្តទៀត នៃសង្គ្រាមពាណិជ្ជកម្មរវាងចិន និងអាមេរិក។
ក្រោយទទួលផលប៉ះពាល់ដោយសារពន្ធនាំចូលរបស់អាមេរិក ដែលបានកំណត់លើផលិតផលដែលដំឡើងក្នុងប្រទេសចិន កាលពីចុងឆ្នាំ២០១៨ ក្រុមហ៊ុន Pegatron បានងាកពីចិនទៅតៃវ៉ាន់ និងបានជួលរោងចក្រ នៅតំបន់ឧស្សាហកម្មមួយ នៅកោះ Batam ភាគខាងត្បូងប្រទេសឥណ្ឌូណេស៊ី។ ក្រុមហ៊ុន ក៏មានគម្រោងសាងសង់រោងចក្រជាច្រើនទៀត នៅវៀតណាម និងឥណ្ឌា ក្នុងរយៈពេល ៣ឆ្នាំខាងមុខ។
Financial Times ឲ្យដឹងទៀតថា Apple មិនទាន់មានការប្រកាសជាផ្លូវការណាមួយ ដែលបញ្ជាឲ្យ Foxconn និង Pegatron ដំឡើង iPhone នៅរោងចក្រ ដែលស្ថិតនៅក្រៅប្រទេសចិននោះទេ។
សូមជម្រាបថា Foxconn ត្រូវបានរដ្ឋាភិបាលវៀតណាម ផ្ដល់ដីសម្រាប់សាងសង់រោងចក្រ នៅក្នុងតំបន់ឧស្សាហកម្ម ស្ថិតនៅភាគឦសាន ក្រុងហាណូយ។ ចំពោះគម្រោងនៅឥណ្ឌា Foxconn កំពុងស្ថិតក្នុងការពិចារណានៅឡើយ ដោយសារបញ្ហាកង្វះហេដ្ឋារចនាសម្ព័ន្ធ និងបញ្ហាច្បាប់ ហើយរដ្ឋាភិបាលឥណ្ឌា មិនបានអនុវត្តតាមសន្យាក្នុងការផ្ដល់ការលើកទឹកចិត្តផ្នែកវិនិយោគ៕
អត្ថបទទាក់ទង
រោងចក្រដំឡើង iPhone ធំទី១ ចាប់ផ្ដើមបោះជំហានចេញពីចិន ទៅកាន់វៀតណាម
មេ Apple បន្ទោសកត្តា ២យ៉ាង ដែលធ្វើឲ្យការលក់ដាំក្បាលចុះ
នាយករដ្ឋមន្ត្រីវៀតណាម៖ យើងត្រៀមរួចជាស្រេច ដើម្បីក្ដាប់ឱកាសក្នុងសង្គ្រាមពាណិជ្ជកម្ម