អគាររបស់កម្ពុជា ដែលខ្ពស់ជាងគេនៅអាស៊ាន ត្រូវបានបើកការដ្ឋានសាងសង់ហើយ

2018-03-19 07:47:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គម្រោងអគារ «មជ្ឈមណ្ឌលពាណិជ្ជកម្ម ថៃប៊ុនរ៉ុង» ដែលខ្ពស់ជាងគេនៅអាស៊ាន ត្រូវបានរៀបចំពិធីក្រុងពាលី បើកការដ្ឋានសាងសង់នៅព្រឹកថ្ងៃទី ១៩ ខែមីនា ឆ្នាំ២០១៨ នៅអតីតទីតាំងមជ្ឈមណ្ឌលកម្សាន្ត Dream Land ទល់មុខសណ្ឋាគារ និងកាស៊ីណូណាហ្គាវើល។

លោកសាស្ត្រាចារ្យ ទួស សាភឿន អ្នកកាន់គម្រោងនេះ បានថ្លែងថា អគារនេះត្រូវបានសាងសង់នៅលើផ្ទៃដីទំហំ ជិត ៥ម៉ឺនម៉ែត្រក្រឡា ដែលមានកម្ពស់ ៥៦១,៧ម៉ែត្រ ១៣៣ជាន់។ បើគិតបញ្ចូលទាំងកម្ពស់អង់តែន ២៥ម៉ែត្រទៀតគឺមានកម្ពស់រហូតដល់ ៥៨៦,៧ម៉ែត្រឯណោះ។

សូមបញ្ជាក់ថា បច្ចុប្បន្ន អគារខ្ពស់ជាងគេនៅអាស៊ានគឺ Petronas Tower នៃប្រទេសម៉ាឡេស៊ី ដែលមានកម្ពស់ ៤៥២ម៉ែត្រ ៨៨ជាន់។

មជ្ឈមណ្ឌលពាណិជ្ជកម្មលំដាប់ពិភពលោកនេះ រួមបញ្ចូលនូវសណ្ឋាគារកម្រិតផ្កាយ៥ ខុនដូប្រណីត អាផាតមិន ការិយាល័យលំដាប់អន្តរជាតិ ផ្សារទំនើបចម្រុះ ភោជនីយដ្ឋាន និងសេវាកម្មកម្សាន្តលំដាប់ពិភពលោកជាច្រើនកន្លែង និងកន្លែងទេសចរណ៍គយគន់ទេសភាពរាជធានីភ្នំពេញ។ អគារនេះមានចំណតរថយន្តចំនួន ៣៨០០គ្រឿង និងម៉ូតូចំនួន ៣ពាន់គ្រឿង នៅក្រោមដីចំនួន២ជាន់ សម្រាប់អ្នកចូលមកប្រើប្រាស់អគារនេះ។

លោក រំពឹងថា ក្រោយបញ្ចប់ការសាងសង់ អគារមជ្ឈមណ្ឌលនេះ នឹងអាចទាក់ទាញក្រុមហ៊ុនលំដាប់អន្តរជាតិធំៗ ឲ្យចូលមកប្រទេសកម្ពុជាកាន់តែច្រើនថែមទៀត ព្រោះបច្ចុប្បន្ននេះកម្ពុជាមិនទាន់មានការិយាល័យលំដាប់ពិភពលោក ដែលអាចទាក់ទាញក្រុមហ៊ុនអន្តរជាតិធំៗមកបើកការិយាល័យនៅរាជធានីភ្នំពេញបានច្រើននៅឡើយ៕

ចុចអាន៖

អត្ថបទ៖ ស៊ិន សាវ៉េត