ប្រមុខការពារជាតិអាមេរិក លើកឡើងសេណារីយ៉ូ២ ជាមួយចិន លើបញ្ហាសមុទ្រចិនខាងត្បូង

2018-06-02 03:40:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Jim Mattis រដ្ឋមន្រ្តីការពារអាមេរិក បានលើកឡើងពីសេណារីយ៉ូចំនួន២ លើបញ្ហាជម្លោះសមុទ្រចិនខាងត្បូង ជាមួយនឹងក្រុងប៉េកាំង ដែលសេណារីយ៉ូទាំងពីរនោះ មានទាំងកិច្ចសហការ និងការប្រឈមមុខដាក់គ្នាដោយកម្លាំង។ ការលើកឡើងរបស់ប្រមុខការពារជាតិអាមេរិករូបនេះ បានធ្វើឡើងអំឡុងលោកចូលរួមកិច្ចប្រជុំ Shangri-La ដែលធ្វើឡើងនៅប្រទេសសិង្ហបុរី នាថ្ងៃទី២ ខែមិថុនា ២០១៨នេះ។

លោក Jim Mattis រដ្ឋមន្រ្តីការពារអាមេរិក ថ្លែងក្នុងកិច្ចប្រជុំ Shangri-La នៅសិង្ហបុរី (រូបភាព៖ RT)

លោក Jim Mattis បានលើកឡើងសេណារីយ៉ូទីមួយថា អាមេរិកមានឆន្ទៈដើម្បីធ្វើការជាមួយចិនលើទំនាក់ទំនងតម្រង់ឆ្ពោះទៅរកលទ្ធផល។ ចំណែកសេណារីយ៉ូទីពិរ លោកបានលើកឡើងថា សកម្មភាពរបស់ក្រុងប៉េកាំងនៅសមុទ្រចិនខាងត្បូងបានក្លាយជាចម្ងល់នៃចេតនារបស់ចិន ហើយមន្ទីរបញ្ចកោណអាមេរិកនឹងតទល់ដោយកម្លាំង ប្រសិនបើចាំបាច់។

ជាងនេះទៅទៀត តាមរយៈសុន្ទរកថាដែលត្រូវបានរៀបចំទុកជាមុន ប្រមុខការពារជាតិអាមេរិករូបនេះបានថ្លែងថា "គោលនយោបានចិននៅសមុទ្រចិនខាងត្បូងមានជំហរផ្ទុយស្រឡះទៅនឹងការបើកទូលាយ ដែលជាការសន្យាយុទ្ធសាស្រ្តរបស់ពួកយើង។ វាត្រូវតែមានការងឿងឆ្ងល់ពីគោលបំណងដ៏មហិមារបស់ចិន"។

សូមបញ្ជាក់ថា ការលើកឡើងរបស់លោករដ្ឋមន្រ្តីការពារជាតិអាមេរិករូបនេះ គឺស្របពេលដែលចិន និងអាមេរិកកំពុងមានភាពតានតឺងដាក់គ្នាជាថ្មី លើបញ្ហាជម្លោះសមុទ្រចិនខាងត្បូង។ កាលពីខែឧសភា ២០១៨ កន្លងទៅ កងទ័ពអាកាសចិនបានប្រើយន្តហោះទម្លាក់គ្រាប់បែកជាច្រើនគ្រឿងចុះចតនៅលើកោះជម្លោះ ក្នុងដែនសមុទ្រចិនខាងត្បូង។ នៅខែឧសភានេះដដែល តាមរយៈរូបភាពដែលចាប់បានពីផ្កាយរណប បានបង្ហាញថា ក្រុងប៉េកាំងបានរៀបចំដំឡើងមីស៊ីលជាច្រើនប្រភេទ នៅលើកោះ Woody ក្នុងសមុទ្រចិនខាងត្បូង។ ប៉ុន្ដែជាមួយគ្នានេះ នាវាចម្បាំងអាមេរិក ២គ្រឿងក៏បានចូលមកក្នុងដែលសមុទ្រចិនខាងត្បូងផងដែរ កាលពីចុងខែឧសភា កន្លងទៅ៕