ប៊ូអ៊ីញ នឹងខាតលុយប៉ុន្មាន បើក្រុមហ៊ុននានាលុបចោលការកុម្ម៉ង់ទិញយន្តហោះ 737 Max?

2019-03-15 03:46:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមការប៉ាន់ស្មានរបស់ទីភ្នាក់ងារវាយតម្លៃឥណទាន Moody's ដែលមានមូលដ្ឋាននៅសហរដ្ឋអាមេរិក ថ្មីៗនេះបានឲ្យដឹងថា ក្រុមហ៊ុនយន្តហោះ ប៊ូអ៊ីញ (Boeing) កំពុងផលិត និងជំពាក់អ្នកកុម្ម៉ង់ទិញ យន្តហោះប្រភេទ Boeing 737 Max ប្រមាណ ៤៦៩៩គ្រឿង។

ប្រសិនបើ ក្រុមហ៊ុនអាកាសចរណ៍នានា លុបចោលការកុម្ម៉ង់ទិញប្រភេទ Boeing 737 Max នោះ ក្រុមហ៊ុន ប៊ូអ៊ីញ អាចខាតបង់ប្រមាណជាង ៤០០ ពាន់លានដុល្លារអាមេរិក។ នេះបើតាមតម្លៃប៉ាន់ស្មានរបស់ទីភ្នាក់ងារ Moody's ។

ប៊ូអ៊ីញ ចំណេញចន្លោះពី ១២ ទៅ ១៥ លានដុល្លារអាមេរិក សម្រាប់ការលក់យន្តហោះ 737 Max 8 ក្នុងមួយគ្រឿងដែលមានតម្លៃប្រហែល ១២០ លានដុល្លារអាមេរិក។ យ៉ាងណាក៏ដោយ តម្លៃនេះ មិនត្រូវបានបញ្ជាក់ជាផ្លូវការពី ប៊ូអ៊ីញ នោះទេ។

កាលពីឆ្នាំ២០១៨ ប៊ូអ៊ីញបានផលិត យន្តហោះនេះបាន ៥២គ្រឿងក្នុងមួយខែ ហើយក្រុមហ៊ុននេះគ្រោងផលិតឲ្យបាន ៥៧គ្រឿងក្នុងមួយខែ នៅឆ្នាំ២០១៩នេះ។

សូមជម្រាបថា ប្រទេសជាច្រើននៅទូទាំងពិភពលោក ដែលរាប់បញ្ចូលទាំងសហរដ្ឋអាមេរិក បានផ្អាកប្រតិបត្តិការ យន្តហោះ 737 Max បន្ទាប់ពីការធ្លាក់ជើងហោះហើររបស់អាកាសចរណ៍អេត្យូពី កាលពីសប្ដាហ៍មុន ដែលបានសម្លាប់មនុស្ស ១៥៧នាក់។ វាជាការធ្លាក់លើកទី២ របស់យន្តហោះ 737 Max ក្នុងរយៈពេលមិនដល់កន្លះឆ្នាំឡើយ ដោយការធ្លាក់លើកទី១ កើតឡើងកាលពីខែតុលា ឆ្នាំ២០១៨ ចំពោះជើងហោះហើររបស់អាកាសចរណ៍ Lion Air នៃប្រទេសឥណ្ឌូណេស៊ី ដែលសម្លាប់មនុស្ស ១៨៩នាក់៕

អត្ថបទទាក់ទង