ព្រឹត្តិការណ៍នយោបាយជាតិ-អន្តរជាតិសំខាន់ៗប្រចាំសប្តាហ៍
- 2018-05-20 09:43:53
- ចំនួនមតិ 0 | ចំនួនចែករំលែក 0
ព្រឹត្តិការណ៍នយោបាយជាតិ-អន្តរជាតិសំខាន់ៗប្រចាំសប្តាហ៍
ចន្លោះមិនឃើញ
Kley Kley សូមលើកយកព្រឹត្តិការណ៍នយោបាយជាតិ និងអន្តរជាតិសំខាន់ៗ ដែលបានកើតឡើងក្នុង១សប្តាហ៍កន្លងមកនេះ មកបង្ហាញជូនដូចខាងក្រោម។
ព្រឹត្តិការណ៍នយោបាយជាតិ
១. គណបក្សចំនួន២០ បានចូលរួមប្រកួតប្រជែងក្នុងការបោះឆ្នោតនាខែកក្កដាខាងមុខ
គិតចាប់ពីថ្ងៃទី៣០ ខែមេសា ដល់ថ្ងៃទី១៤ ខែឧសភា ឆ្នាំ២០១៨ មានគណបក្សនយោបាយចំនួន ២០ បានចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ នៅគណៈកម្មាធិការជាតិរៀបចំការបោះឆ្នោត (គ.ជ.ប) ដើម្បីចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រ អាណត្តិទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨។
គិតត្រឹមថ្ងៃទី១៩ ខែឧសភា ឆ្នាំ២០១៨ គ.ជ.ប បានទទួលស្គាល់ចុះបញ្ជីជាផ្លូវការគណបក្សចំនួន១៣ហើយ និងនៅសល់ ៧ទៀត នឹងត្រូវប្រកាសទទួលស្គាល់ចុះបញ្ជីជាផ្លូវការជាបន្តបន្ទាប់ទៀត។
២. សមាគមគ្រឹះស្ថានឧត្តមសិក្សា ប្រកាសចូលរួមសង្កេតការណ៍បោះឆ្នោត ខណៈអង្គការធំ២ មិនចូលរួម
ខណៈដែលអង្គការខុមហ្វ្រែល និងអង្គការនិចហ្វ្រិក បានប្រកាសមិនចូលរួមសង្កេតការណ៍ក្នុងការបោះឆ្នោតជ្រើសតាំងតំណាងរាស្ត្រ ខាងមុខនេះ សមាគមគ្រឹះស្ថានឧត្តមសិក្សាកម្ពុជា បានប្រកាសបញ្ជូនសមាជិកប្រមាណ ២ពាន់នាក់ ដើម្បីចូលរួមធ្វើជាអ្នកសង្កេតការណ៍បោះឆ្នោតនៅទូទាំង២៥រាជធានី-ខេត្ត។
លោក ហេង វ៉ាន់ដា ប្រធានសមាគមគ្រឹះស្ថានឧត្តមសិក្សាកម្ពុជា បានថ្លែងប្រាប់ខ្លីៗ កាលពីរសៀលថ្ងៃទី១៦ ខែឧសភាថា ការចូលរួមសង្កេតការណ៍បោះឆ្នោតខាងមុខនេះ គឺដើម្បីចូលរួមចំណែកក្នុងការធ្វើឱ្យការបោះឆ្នោតប្រព្រឹត្តដោយរលូន យុត្តិធម៌ ត្រឹមត្រូវ សន្តិភាព និងសុខមាលភាពជូនដល់ប្រជាពលរដ្ឋ ព្រមទាំងអាចទទួលយកបានផងដែរ។
៣. គ.ជ.ប ស្នើសុំឱ្យក្រសួងមហាផ្ទៃ ចាត់វិធានការលើអ្នកដែលអំពាវនាវមិនឲ្យប្រជាពលរដ្ឋទៅបោះឆ្នោត
លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃទី១៧ ខែឧសភា ឆ្នាំ២០១៨ បានស្នើសុំឲ្យក្រសួងមហាផ្ទៃ ចាត់វិធានការផ្លូវច្បាប់ទៅលើអ្នកដែលអំពាវនាវឲ្យប្រជាពលរដ្ឋធ្វើពហិការក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨។
ការស្នើឲ្យមានវិធានការច្បាប់នេះ គឺបន្ទាប់ពីលោក សម រង្ស៊ី មេដឹកនាំចលនាសង្គ្រោះជាតិ និងជាអតីតប្រធានអតីតគណបក្សសង្គ្រោះជាតិ បានធ្វើការអំពាវនាវឲ្យប្រជាពលរដ្ឋកុំទៅបោះឆ្នោត និងគ្រោងបោះខិតបណ្ណចែកប្រជាពលរដ្ឋ កុំឲ្យទៅចូលរួមបោះឆ្នោតនៅថ្ងៃទី ២៩ ខែកក្កដា ឆ្នាំ២០១៨ ខាងមុខនេះថែមទៀតផង៕
៤. លោក សួន សេរីរដ្ឋា ត្រូវតុលាការតម្កល់ទោស៥ឆ្នាំដដែលពីបទប្រមាថកងទ័ព
នៅថ្ងៃទី១៨ ខែឧសភា ឆ្នាំ២០១៨ នេះ លោក ឃឹម ប៉ុណ្ណ ប្រធានក្រុមប្រឹក្សាជំនុំជម្រះតុលាការកំពូល សម្រេចតម្កល់សាលដីកាសាលាឧទ្ធរណ៍ ទុកជាបានការដដែល ពោលគឺលោក សួន សេរីរដ្ឋា អតីតប្រធានគណបក្ស អំណាចខ្មែរ ត្រូវជាប់គុក៥ឆ្នាំដដែល ក្នុងករណីប្រមាថធ្ងន់ធ្ងរលើកងទ័ព។
លោកសួន សេរីរដ្ឋា ត្រូវជាប់ចោទពីបទ “ញុះញង់កុំឲ្យយោធិនស្ដាប់បង្គាប់ បទធ្វើឲ្យខូចទឹកចិត្តកងទ័ព និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៧១ មាត្រា៤៧២ មាត្រា៤៩៤ និងមាត្រា ៤៩៥ នៃក្រមព្រហ្មទណ្ឌ”។
ព្រឹត្តិការណ៍នយោបាយអន្តរជាតិ
១. ស្លាប់ និងរបួសរាប់ពាន់នាក់ ក្នុងការប៉ះទង្គិចគ្នារវាងកងទ័ពអ៊ីស្រាអែល និងជនជាតិប៉ាឡេស្ទីន
ជនជាតិប៉ាឡេស្ទីន ៥៨នាក់បានស្លាប់ និងជាង ២៧០០នាក់បានរងរបួស ដោយសារកងទ័ពអ៊ីស្រាអែលបានបើកការបាញ់រះគ្រាប់កាំភ្លើង ឧស្ម័នបង្ហូរទឹកភ្នែក និងគ្រាប់បែកភ្លើង ដាក់លើក្រុមអ្នកតវ៉ា ដែលបានប្រមូលផ្ដុំជាច្រើនទីតាំង កាលពិថ្ងៃទី១៤ ខែឧសភា ២០១៨។ ការប្រមូលផ្ដុំតវ៉ារបស់ជនជាតិប៉ាឡេស្ទីន គឺដើម្បីប្រឆាំងនឹងការបើកស្ថានទូតសហរដ្ឋអាមេរិកប្រចាំនៅក្រុង Jerusalem។
២. កូរ៉េខាងជើង លុបចោលជំនួបចរចាកម្រិតខ្ពស់ជាមួយកូរ៉េខាងត្បូង
ក្រុងព្យុងយ៉ាង កាលពីថ្ងៃទី១៦ ខែឧសភា ២០១៨ បានប្រកាសលុបចោលជំនួបចរចាកម្រិតខ្ពស់រវាងប្រទេសកូរ៉េទាំងពីរ ដោយសារការធ្វើសមយុទ្ធរួមគ្នារវាងកងទ័ពអាកាសកូរ៉េខាងត្បូង និងអាមេរិក។
តាមការគ្រោងទុក គឺនៅថ្ងៃទី១៦ ខែឧសភា ២០១៨ គណៈប្រតិភូជាន់ខ្ពស់របស់ប្រទេសកូរ៉េទាំងពីរ នឹងត្រូវជួបពិភក្សាគ្នា នៅតំបន់គ្មានយោធា ពីយន្តការបន្ទាប់ ក្រោយជំនួបកំពូលរវាងប្រធានាធិបតីកូរ៉េខាងត្បូង មូន ចេអ៊ីន និងមេដឹកនាំកូរ៉េខាងជើង គីម ជុងអ៊ុន។ ចុចអានលម្អិត
៣. ប៉ូលិសចុះឆែកឆេរ ៥ទីតាំង ពាក់ព័ន្ធនឹងអតីតនាយករដ្ឋមន្ត្រី Najib Razak
ប៉ូលិសម៉ាឡេស៊ី បានបើកការស៊ើបអង្កេតលើទីតាំង ៥កន្លែង ចាប់ទាំងពីយប់ថ្ងៃទី១៦ ខែឧសភា រហូតដល់ព្រឹកថ្ងៃទី១៧ ខែឧសភា ២០១៨ ពាក់ព័ន្ធនឹងអតីតនាយករដ្ឋមន្រ្តីម៉ាឡេស៊ី លោក Najib Razak ដែលក្នុងនោះ ក៏មានទាំងផ្ទះដែលក្រុមគ្រួសាររបស់លោករស់នៅផងដែរ។
សូមបញ្ជាក់ថា ការចុះឆែកឆេរនៅផ្ទះរបស់លោក Najib នេះ ធ្វើឡើងបន្ទាប់ពីលោកព្យាយាមចាកចេញពីប្រទេសម៉ាឡេស៊ី កាលពីថ្ងៃសៅរ៍ សប្ដាហ៍មុន។ ប៉ុន្តែនាយកដ្ឋានអន្តោប្រវេសន៍ម៉ាឡេស៊ី បានដាក់ឈ្មោះរបស់លោក Najib និងភរិយា ក្នុងបញ្ជីខ្មៅ ដោយមិនអនុញ្ញាតឲ្យពួកគាត់ចេញពីប្រទេសឡើយ។
៤. អាមេរិក កូរ៉េខាងត្បូង និងជប៉ុន ព្រមព្រៀងគ្នាបង្វែរទិសដៅហោះហើររបស់យន្តហោះ B-52
សហរដ្ឋអាមេរិក កូរ៉េខាងត្បូង និងជប៉ុន នៅសប្ដាហ៍នេះ បានព្រមព្រៀងគ្នា ដើម្បីបង្វែរទិសដៅហោះហើររបស់យន្តហោះទម្លាក់គ្រាប់បែកនុយក្លេអ៊ែរ B-52 ចំនួន ២គ្រឿង ចេញពីឧបទ្វីបកូរ៉េ ក្នុងសប្តាហ៍នេះ។
ការសម្រេចនេះ ត្រូវបានធ្វើឡើងបន្ទាប់ពីកូរ៉េខាងជើងប្រឆាំងនឹងសមយុទ្ធរបស់យោធាអាមេរិកក្នុងឧបទ្វីបកូរ៉េ និងគំរាមមិនចូលរួមកិច្ចប្រជុំកំពូល ដែលត្រូវធ្វើឡើងសម្រាប់មេដឹកនាំកូរ៉េខាងជើងលោក គីម ជុងអ៊ុន និងលោកប្រធានាធិបតីអាមេរិក ដូណាល់ ត្រាំ។