នាយករដ្ឋមន្រ្តីកម្ពុជា ហៅប្រទេសចិនថាជា "បងប្អូន" ក្រោយចិនប្រកាសផ្តល់ជំនួយជិត ៦០០លានដុល្លារ

2019-01-23 03:47:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានលើកឡើងតាមរយៈទំព័រហ្វេសប៊ុកនាព្រឹកថ្ងៃទី២៣ ខែមករា ឆ្នាំ២០១៩នេះថា រដ្ឋាភិបាលប្រទេសចិនជាបងប្អូន ដោយបានប្រកាសផ្តល់នូវជំនួយជិត ៦០០លានដុល្លារ ហើយបានដំឡើងកូតាអង្ករ រហូតដល់ ៤សែនតោន ដល់កម្ពុជាទៀតផង។

សម្តេចបានសរសេរយ៉ាងដូច្នេះថា៖ «កម្ពុជានិងចិន គឺគោរពស្រឡាញ់គ្នាដូចជាបងប្អូន។ ការរីកចម្រើនរបស់កម្ពុជា មកទល់សព្វថ្ងៃ គឺមិនអាចកាត់ផ្តាច់ចេញពីទំនាក់ទំនងដ៏ល្អ និងការចូលរួមរបស់មិត្តចិនបានឡើយ»។

ក្នុងអំឡុងទស្សនកិច្ចនៅប្រទេសចិន រយៈពេល៣ថ្ងៃមកនេះ សម្តេច ហ៊ុន សែន បញ្ជាក់ថា សម្តេចបានជួបពិភាក្សាការងារជាមួយ លោកប្រធានាធិបតីចិន ស៊ី ជីនពីង, លោកនាយករដ្ឋមន្រ្តី លី ខឺឈាង និងលោកប្រធានរដ្ឋសភា វ៉ាង យ៉ាង ដែលបានរឹតចំណងមិត្តភាពប្រទេសទាំងពីរ ឱ្យកាន់តែល្អរឹងមាំថែមទៀត ជាពិសេសគឺបានពង្រឹង និងពង្រីកនូវកិច្ចសហប្រតិបត្តិការលើវិស័យសំខាន់ៗដូចជា កសិកម្ម ពាណិជ្ជកម្ម វិនិយោគ ទេសចរណ៍ និងហេដ្ឋារចនាសម្ព័ន្ធជាដើម ។

សម្តេច ហ៊ុន សែន ក្នុងជំនួបជាមួយលោក លី ខឺឈាង នៅក្រុងប៉េកាំង កាលពីថ្ងៃទី២២ មករា ២០១៩ (រូបថត៖ ផ្តល់សិទ្ធិដោយ Reuters)

សម្តេចបន្តថា កម្ពុជាបានត្រៀមខ្លួនជាស្រេចរួចហើយ ដើម្បីជំរុញគម្រោងផ្លូវ១ខ្សែក្រវាត់១ ជាមួយប្រទេសចិន ឱ្យបានជោគជ័យ។ ទន្ទឹមនឹងនេះដែរ ប្រទេសទាំងពីរ នឹងខិតខំជំរុញទំហំពាណិជ្ជកម្ម ឱ្យឡើងដល់ ១០ពាន់លានដុល្លារនៅឆ្នាំ២០២៣។

សូមជម្រាបថា នៅព្រឹកថ្ងៃទី២៣ ខែមករា ឆ្នាំ២០១៩នេះ សម្តេច ហ៊ុន សែន នឹងដឹកនាំគណៈប្រតិភូជាន់ខ្ពស់កម្ពុជា វិលមកកាន់មាតុប្រទេសវិញ៕

អត្ថបទទាក់ទង៖