គណបក្ស ហ៊្វុន ស៊ិន ប៉ិច មានគោលនយោបាយ លុបបំបាត់បទល្មើសក្នុងមូលដ្ឋាន និងមិនឱ្យមានអ្នកស្លាប់ដោយអត់លុយព្យាបាលឡើយ

2017-05-31 04:42:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណបក្ស ហ៊្វុន ស៊ិន ប៉ិច នឹងអនុវត្តគោលនយោបាយ ៨ចំណុច នៅពេលជាប់ឆ្នោតជា មេឃុំ/ចៅសង្កាត់ ក្នុងការបោះឆ្នោតឆ្នាំ២០១៧នេះ។

១. លទ្ធិប្រជាធិបតេយ្យ សិទ្ធិសេរីភាព និងយុត្តិធម៌សង្គម៖ គោរពប្រជារាស្រ្តម្ចាស់អំណាច ម្ចាស់ទឹក ម្ចាស់ដី បង្កលក្ខណៈឱ្យប្រជារាស្រ្តចូលរួមធ្វើសេចក្តីសម្រេចចិត្ត។ ប្រជារាស្រ្តអាចសម្តែងមតិ និងលើកជាសំណូមពរអំពីតម្រូវការពួកគេ។ លើកតម្កើងសិទ្ធិសេរីភាពប្រជារាស្រ្ត និងសមភាពយេនឌ័រ។

២. សេវាសាធារណៈ៖ ចេញលិខិតស្នាមរដ្ឋបាលផ្សេងៗ ជូនប្រជារាស្រ្ត ដោយមិនរើសអើង និងមិនប្រកាន់បក្សពួក។ លុបបំបាត់អំពើពុករលួយ ចំពោះសេវាសាធារណៈក្នុងឃុំ-សង្កាត់ និងមិនអនុញ្ញាតឱ្យយកកម្រៃ លើលិខិតស្នាមលើសពីច្បាប់កំណត់ឡើយ។

៣. អភិវឌ្ឍន៍មូលដ្ឋាន៖ ស្វះស្វែងរកគម្រោងអភិវឌ្ឍន៍ពីអង្គការនានា ឱ្យចូលមកអភិវឌ្ឍន៍ក្នុងមូលដ្ឋាន ឃុំ-សង្កាត់។ ស្តារឡើងវិញនូវប្រព័ន្ធធារាសាស្រ្ត ទឹកស្អាត អគ្គិសនី ស្វែងរកការងារជូនប្រជារាស្រ្ត នៅក្នុងមូលដ្ឋាន។ ស្វែងរកទីផ្សារ និងធានាតម្លៃកសិផលជូនកសិករ ទប់ស្កាត់ការចូលក្រឡុកទីផ្សាររបស់ឈ្មួញ។

៤. សុខមាលភាព និងសង្គមកិច្ច៖ រៀបចំពេទ្យស្ម័គ្រចិត្ត ចុះពិនិត្យជំងឺ ដល់ប្រជាជនក្នុងមូលដ្ឋាន។ រៀបចំមធ្យោបាយដឹកជញ្ជូនអ្នកជំងឺសង្គ្រោះបន្ទាន់ ទៅមន្ទីរពេទ្យ និងមិនឱ្យមានអ្នកស្លាប់ ដោយខ្វះប្រាក់សម្រាប់ព្យាបាលឡើយ។

៥. សិក្សាអប់រំ យុវជន និងកីឡា៖ ជំរុញការអភិវឌ្ឍធនធានមនុស្ស សម្រាប់ការសិក្សាអប់រំទាំងក្នុង និងក្រៅប្រទេស និងមជ្ឈមណ្ឌលបណ្តុះបណ្តាលវិជ្ជាជីវៈ។ បង្កលក្ខណៈងាយស្រួលក្នុងការសិក្សា និងកីឡាជូនដល់យុវជន និងយុវនារី ក្នុងមូលដ្ឋាន ដើម្បីកាយសម្បទារឹងមាំ។

៦. សន្តិសុខ និងសណ្តាប់ធ្នាប់សាធារណៈ៖ មិនឱ្យមានចោរលួចចោរប្លន់ បទល្មើសនេសាទ ល្បែងស៊ីសង ក្រុមបងតូចបងធំ នៅក្នុងមូលដ្ឋានឡើយ។

៧. ដីធ្លី៖ ទប់ស្កាត់ការរឹបអូស និងរំលោភយកដីធ្លី របស់ប្រជារាស្រ្ត ពីអ្នកមានអំណាច។ រៀបចំដីសង្គមកិច្ច និងធ្វើប័ណ្ណកម្មសិទ្ធិជូនប្រជារាស្រ្ត។

៨. បរិស្ថាន និងធនធានធម្មជាតិ៖ ចងក្រងសហគមន៍ការពារព្រៃឈើ នៅមូលដ្ឋាន ទប់ស្កាត់ការកាប់បំផ្លាញព្រៃឈើ។ គ្រប់គ្រងការបង្ហូរកាកសំណល់ នៃសិប្បកម្មរោងចក្រ ដែលប៉ះពាល់ដល់បរិស្ថាន និងសុខភាពប្រជារាស្រ្ត ក្នុងមូលដ្ឋាន។

សូមបញ្ជាក់ថា គណបក្ស ហ៊្វុន ស៊ិន ប៉ិច បានចុះបញ្ជីឈរឈ្មោះបោះឆ្នោត នៅឃុំ-សង្កាត់ ចំនួន ៨៤៦ ក្នុងគ្រប់រាជធានី-ខេត្ត លើកលែងតែខេត្តប៉ៃលិនមួយប៉ុណ្ណោះ ដែលមានបេក្ខជនសរុបចំនួន ១២៧៦២នាក់ ក្នុងនោះស្រ្តី ៤៨៥៨នាក់៕

អត្តបទពាក់ព័ន្ធនឹងគោលនយោបាយគណបក្សផ្សេងៗ៖

១. គណបក្សសំបុកឃ្មុំសង្គមប្រជាធិបតេយ្យ

២. គណបក្សជនជាតិដើមប្រជាធិបតេយ្យកម្ពុជា

៣. គណបក្សសញ្ជាតិកម្ពុជា

៤. គណបក្សសាធារណរដ្ឋប្រជាធិបតេយ្យ

៥. គណបក្សយុវជនកម្ពុជា

៦. គណបក្សប្រជាធិបតេយ្យមូលដ្ឋាន

បញ្ជាក់៖ ខ្លីៗ នឹងជម្រាបជូនពីគោលនយោបាយរបស់គណបក្សដទៃទៀតជាបន្តបន្ទាប់

អត្ថបទ៖ សំភី