កាណាដា ចង់ធ្វើបត្យាប័នមេ Huawei តាមសំណើអាមេរិក ក្រោយឆ្អែតឆ្អន់ជាមួយចិន

2019-01-22 06:42:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមសារព័ត៌មាន Globe and Mail ដែលមានប្រភពនៅប្រទេសកាណាដា បានរាយការណ៍នៅថ្ងៃទី២២ ខែមករា ឆ្នាំ២០១៩នេះថា ឯកអគ្គរដ្ឋទូតកាណាដាប្រចាំសហរដ្ឋអាមេរិក លោក David MacNaughton បានជួបជាមួយមន្ត្រីជាន់ខ្ពស់សេតវិមាន និងមន្ត្រីក្រសួងការបរទេសអាមេរិក ដើម្បីពិភាក្សាលើការធ្វើបត្យាប័នលោកស្រី Meng Wanzhou ប្រធានផ្នែកហិរញ្ញវត្ថុក្រុមហ៊ុនចិន Huawei។

លោក David MacNaughton ឯកអគ្គរដ្ឋទូតកាណាដាប្រចាំសហរដ្ឋអាមេរិក (រូបថត៖ Tishan Baldeo)

ប្រភពបន្តថា លោក MacNaughton បានបង្ហាញកំហឹង និងការអាក់អន់ចិត្ត ទៅកាន់ក្រុងវ៉ាស៊ីនតោន ដោយសារជម្លោះជាមួយចិន ក្រោយការឃាត់ខ្លួនលោកស្រី Meng កាលពីខែធ្នូកន្លងទៅ។ ក្រុងប៉េកាំង បានចាប់ខ្លួនជនជាតិកាណាដា ចំនួន ២រូបជាបន្តបន្ទាប់ និងបានដាក់ទោសប្រហារជីវិតជនជាតិកាណាដាម្នាក់ទៀត ដែលជាប់ពាក់ព័ន្ធនឹងករណីរត់ពន្ធគ្រឿងញៀន។

Globe and Mail បានដកស្រង់សម្ដីលោកឯកអគ្គរដ្ឋទូតកាណាដាប្រចាំសហរដ្ឋអាមេរិកថា៖ «ពួកយើង មិនត្រេកអរទេចំពោះរឿងជនជាតិកាណាដា ត្រូវបានគេដាក់ទណ្ឌកម្មនោះ... (អាមេរិក) ជាអ្នកចង់ប្រើប្រាស់ច្បាប់របស់ខ្លួន (ប្រឆាំងនឹងលោកស្រី Meng) តែពួកយើងទៅវិញទេ ដែលជាអ្នកទទួលរងលទ្ធផល។ គឺពលរដ្ឋយើងជាអ្នកទទួល»។

លោក MacNaughton មិនបានបង្ហើបពីកាលបរិច្ឆេទនៃសំណើធ្វើបត្យាប័នលោកស្រី Meng របស់សហរដ្ឋអាមេរិកនោះទេ ដោយកាលកំណត់គឺថ្ងៃទី៣០ ខែមករា ខាងមុខនេះ។

លោកស្រី Meng Wanzhou ប្រធានផ្នែកហិរញ្ញវត្ថុក្រុមហ៊ុនចិន Huawei (រូបថត៖ Reuters)

សូមជម្រាបថា លោកស្រី Meng ដែលត្រូវជាកូនស្រីបង្កើតរបស់ស្ថានិកក្រុមហ៊ុន Huawei គឺលោក Ren Zhengfei កំពុងស្ថិតនៅក្រៅឃុំ នៅលំនៅឋានរបស់លោកស្រីនៅក្រុង Vancouver ដែលមានការយាមកាមយ៉ាងតឹងរ៉ឹង។ លោកស្រី ត្រូវបានចោទប្រកាន់ពីការរំលោភទណ្ឌកម្មដែលអាមេរិក ដាក់លើអ៊ីរ៉ង់៕

អត្ថបទទាក់ទង