[វីដេអូ] រឿងពិតពីមុខរបរនេសាទអយស្ទ័រនៅកំពត ដែលលោកអ្នកអាចមិនដឹង

2018-09-03 09:04:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តើអ្នកដឹងទេ កាលពីជាង១០ឆ្នាំមុន អ្នកនេសាទអយស្ទ័រនាពេលបច្ចុប្បន្ននេះ មិនបានដឹងទេថាវាជាខ្យងសមុទ្រម្យ៉ាងដែលអាចញ៉ាំឆៅបាន ពោលគឺពួកគេដឹងត្រឹមថាវាជាខ្យងសមុទ្រធម្មតា ដែលត្រូវយកមកស្ងោរ មុនទទួលទានប៉ុណ្ណោះ។ រហូតដល់ថ្ងៃមួយ ទើបពួកគេដឹង ក្រោយពីមានជនជាតិអូស្រ្ដាលីម្នាក់បានប្រាប់។

ក្រោយបានដឹងរឿងនេះ ពោលគឺនៅឆ្នាំ២០០៨ អ្នកស្រី សុខ លីម អាយុ ៣៩ឆ្នាំ បានចាប់ផ្ដើមនេសាទ និងលក់អយស្ទ័រមុនគេ នៅភូមិព្រែកអំពិល ឃុំកោះតូច ស្រុកទឹកឈូ នៅខេត្តកំពត។ ដំបូងឡើយ អ្នកស្រីលក់អយស្ទ័របន្តិចបន្តួចតែប៉ុណ្ណោះ ដោយសារពលរដ្ឋខ្មែរភាគច្រើនមិនទាន់ស្គាល់នៅឡើយ ប៉ុន្តែបច្ចុប្បន្ន អ្នកស្រីអាចលក់បានរាប់ពាន់គ្រាប់ ឬដល់ខ្ទង់ម៉ឺនគ្រាប់ក្នុងមួយថ្ងៃ។

ចង់ដឹងច្បាស់ សូមប្រិយមិត្តទស្សនាវីដេអូរបស់ក្រុមការងារ "ផ្លូវទៅស្រុក វគ្គ ២" ដូចខាងក្រោម៖

ចុចត្រង់នេះ ដើម្បីទស្សនាវីដេអូជាច្រើនទៀត

សូមទស្សនាបណ្ដុំរូបភាពដូចខាងក្រោម៖

អ្នកស្រី សុខ លីម អាយុ៣៩ឆ្នាំ ជាអ្នកលក់អយស្ទ័រមុនគេ នៅភូមិព្រែកអំពិល ឃុំកោះតូច ស្រុកទឹកឈូ នៅខេត្តកំពត

កម្មកររបស់អ្នកស្រី សុខ លីម កំពុងត្រៀមខ្លួនមុជទឹកចុះទៅនេសាទអយស្ទ័រ ដោយចងដុំថ្មតូចៗនៅជុំវិញចង្កេះ (ពាក់ដើម្បីកុំឱ្យអណ្តែតទឹក) ពាក់វ៉ែនតាទឹក បៀមទុយោខ្យល់ និងត្រូវយកកូនពូថៅទៅជាមួយ

កម្មករនេសាទ កំពុងបើកទូកដឹកអយស្ទ័រត្រឡប់មកច្រាំងវិញ។ ការនេសាទអយស្ទ័រ ធ្វើឡើងស្ទើរពេញមួយថ្ងៃ។ កម្មករចេញទៅសមុទ្រនៅពេលព្រឹកព្រលឹមស្រាងៗ ហើយត្រឡប់មកវិញនៅម៉ោង ២ ឬ ៣ រសៀល។

កម្មករអ្នកស្រី សុខ លីម ប្រើកូនកាំបិតវាយបំបែកកំណកថ្មដែលជាប់នឹងសម្បកអយស្ទ័រ ហើយពុសវាជាពីរ។ អយស្ទ័រដែលនេសាទបានហើយ ត្រូវសម្អាតសម្បកនិង ពុសវាជាពីរ ដោយយកតែផ្នែកដែលជាប់សាច់តែប៉ុណ្ណោះ។ បន្ទាប់មក គេត្រូវគេយកទៅលាងទឹកសម្អាតឱ្យស្អាតល្អ មុននឹងច្រកស្បោង។

នៅពេលលាងទឹករួចហើយ គេចែកចំណាត់ថ្នាក់អយស្ទ័រ និងចាប់ផ្តើមច្រកវាចូលស្បោងប្លាស្ទិក។ បន្ទាប់មកគេរាប់អយស្ទ័រតាមចំនួនកំណត់ហើយដាក់ចូលទៅក្នុងធុងស្នោរក្លាសេ រួចផ្ញើទៅឱ្យអតិថិជននៅតាមរាជធានីនិងខេត្ត។ ក្នុងមួយថ្ងៃៗអ្នកស្រី សុខ លីម លក់អយស្ទ័របានពី ១ម៉ឺន ទៅ២ម៉ឺនគ្រាប់។ ហើយបច្ចុប្បន្ន អ្នកស្រី មានកម្មករជាង៦០នាក់ ដើម្បីជួយធ្វើការងារទាំងអស់នេះឱ្យអ្នកស្រី៕

ចុចអានអត្ថបទទាក់ទង