[វីដេអូ] វិធីភ្ញាស់កូនមាន់​លក់​ របស់​បុរស​ម្នាក់​នៅ​ស្រុកត្រាំកក់

  • 2018-11-12 06:26:38
  • ចំនួនមតិ 0 | ចំនួនចែករំលែក 4

ចន្លោះមិនឃើញ

លោក​ហ៊ី សុធី វ័យ ៤៦ឆ្នាំ ជា​ម្ចាស់​អាជីវកម្ម​ភ្ញាស់​កូន​មាន់​លក់ នៅ​ភូមិ​ត្រពាំង​ស្រងែ ឃុំ​តាភេម ស្រុក​ត្រាំកក់ ខេត្ត​តាកែវ។​ ដោយ​មើល​ឃើញ​ពី​តម្រូវ​ការ​កូន​មាន់ស្រែ មាន​ការ​កើន​ឡើង លោក សុធី បាន​សម្រេច​ចិញ្ចឹម​មេមាន់ និងភ្ញាស់​កូន​លក់ នៅ​ឆ្នាំ​២០១៦។ បច្ចេកទេស​នៃ​ការ​ភ្ញាស់​កូន​មាន់​នេះ បាន​មកពី​ការ​ស្រា​វ​ជ្រាវ​តាម YouTube ដោយ​ខ្លួន​លោក​ផ្ទាល់ និង​ទទួល​បានការ​គាំទ្រ​ពី​វិទ្យាស្ថាន​ស្រាវជ្រាវ​ និង​អភិវឌ្ឍន៍​ជនបទ​កម្ពុជា (CIRD)។

លោក​បាន​ចាប់ផ្ដើម​អាជីវ​កម្ម​របស់​ខ្លួន ដោយ​ការ​ចិញ្ចឹម​មេមាន់​ ៣០ក្បាល និងមាន​ទូ​ភ្ញាស់​កូន​មាន់​តែមួយ​ប៉ុណ្ណោះ។​ បច្ចុប្បន្ន​លោក​មានមេមាន់ ១០០​ក្បាល មាន់ឈ្មោល ១៥ក្បាល និងមាន​ទូភ្ញាស់​ចំនួន៤។ ក្រៅពី​នេះ លោក​ក៏​ទទួល​ទិញ​ពងមាន់​ស្រែ ពី​កសិករ​ដែល​ជា​ដៃគូ​ផ្គត់​ផ្គង់ ផង​ដែរ។

លោក ហ៊ី សុធី ដាក់​ពងមាន់​ចូល​ក្នុង​ទូភ្ញាស់

ជា​រៀងរាល់​ថ្ងៃ លោក ហ៊ី សុធី តែង​ដើរ​ប្រមូល​ពងមាន់​ពី​ទ្រុង​យក​មក​រក្សា​ទុក​ដោយ​ឡែក។ រៀងរាល់ ៥ថ្ងៃម្តង លោក​តែង​យក​ពងមាន់​ទាំងនោះ ដាក់​ចូល​ក្នុង​ទូភ្ញាស់។ មុន​នឹង​ដាក់​ចូល​ក្នុង​ទូភ្ញាស់ លោក ហ៊ី សុធី ចុះ​កាល​បរិច្ឆេទ (ថ្ងៃ​ដាក់ចូល និងថ្ងៃ​ញាស់) នៅ​លើពង​មាន់​ទាំង​នោះ។ ​

បន្ទាប់​ពី​ញាស់​ហើយ កូន​មាន់​ទាំងនោះ នឹង​ត្រូវ​ចាប់​ទៅ​ដាក់​ក្នុង​ទ្រុង​កម្តៅ មួយ​ដាច់​ដោយ​ឡែក។ ក្នុង​ទ្រុង​នោះ​មាន​ទឹក និង​ចំណី​សម្រាប់​កូន​មាន់​ស៊ី។ ចាប់ពី​ ៣​ថ្ងៃ​ឡើង​ទៅ គេ​អាច​ចាប់​កូន​មាន់​ល​ក់បាន​ហើយ។ កូន​មាន់​អាយុ ៣ថ្ងៃ មាន​តម្លៃ ៣៣០០រៀល ឯ​កូន​មាន់​អាយុ ១០ថ្ងៃ មាន​តម្លៃ ៤០០០រៀល៕

ចង់ដឹង​ច្បាស់​បន្ថែម​ទៀត សូមទស្សនាវីដេអូ​របស់​ក្រុមការងារ [ផ្លូវទៅស្រុគ វគ្គ២] ដូចខាងក្រោម៖

ចុចទស្សនា​វីដេអូ​ជាច្រើន​ទៀត ខាងក្រោមនេះ៖

វីដេអូ និងរូបភាព៖ ក្រុមការងារ​ផ្លូវទៅស្រុក


អត្ថបទ៖ សុខ សុវត្ថិ