[វីដេអូ] ២៦ឆ្នាំនៃមុខរបរផលិតស្ករត្នោត របស់បុរសម្នាក់នៅខេត្តសៀមរាប

2018-12-21 08:48:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ស្ទើរគ្រប់ភ្ញៀវទេសចរ ជាពិសេសភ្ញៀវបរទេស មិនសូវរំលង ចូលទស្សនាពីការធ្វើស្ករត្នោត និងវត្ថុអនុស្សាវរីយ៍ ធ្វើពីផលិតផលដើមត្នោតនោះទេ ប៉ុន្ដែមានមនុស្សតិចតួចអាចដឹងអំពីជីវភាពប្រចាំថ្ងៃរបស់អ្នកភូមិ។

លោក ម៉ិ ឡូ ជាអ្នកប្រកបរបរឡើងត្នោត និងផលិតស្ករត្នោត រយៈពេល ២៦ឆ្នាំមកហើយ។ បុរសវ័យ៤៦ឆ្នាំរូបនេះរស់នៅជាមួយគ្រួសារនិងកូនប្រាំនាក់ នៅភូមិតាកុះ ឃុំព្រះដាក ស្រុកបន្ទាយស្រី ខេត្តសៀមរាប។ ក្រៅពីការផលិតស្ករត្នោតលក់ គ្រួសាររបស់លោក ម៉ិ ឡូ ក៏មានតូបលក់របស់របរផលិតពីដើមត្នោត រពាក់ និងវត្ថុអនុស្សាវរីយ៍មួយចំនួនទៀតផងដែរ។

ជារៀងរាល់ព្រឹក ចាប់ពីម៉ោង៥ លោក ម៉ិ ឡូ តែងតែឡើងត្នោតពី២០ទៅ៣០ដើម ដើម្បីយកទឹកត្នោតទៅកូររម្ងាស់ជាស្ករ។ ដើមត្នោតទាំងនោះ ជាដើមត្នោតដែលលោកជួលពីអ្នកជិតខាងខ្លះ និងជារបស់លោកខ្លះ។

ចង់ដឹងរឿងរ៉ាវរបស់លោក ម៉ិ ឡុ សូមប្រិយមិត្តទស្សនាវីដេអូខាងក្រោមនេះ៖

ជារៀងរាល់ព្រឹក ចាប់ពីម៉ោង៥ លោក ម៉ិ ឡូ តែងតែឡើងត្នោតពី២០ទៅ៣០ដើម ដើម្បីយកទឹកត្នោតទៅកូររម្ងាស់ជាស្ករ។

លោក ម៉ិ ឡូ កំពុងបង្កាត់ភ្លើងដើម្បីរម្ងាស់ស្ករត្នោតនៅខាងមុខផ្ទះរបស់លោក។ ដើម្បីឲ្យទឹកត្នោតរីងស្ងួត អាចកូរវឹកជាស្ករបាន លោក ម៉ិ ឡូ ពេលយ៉ាងហោចណាស់ពី១ម៉ោង ទៅ១ម៉ោងកន្លះ អាស្រ័យទៅតាមបរិមាណទឹកត្នោតក្នុងខ្ទះ។

លោក ម៉ិ ឡូ កំពុងអង្គុយវឹកស្ករត្នោតដែលរម្ងាស់រួច។ ការកូរវឹកស្ករត្នោតនេះធ្វើឡើងយ៉ាងលឿននិងប្រុងប្រយ័ត្នបំផុត ដើម្បីកុំឲ្យស្ករត្នោតខូច និងដើម្បីឱ្យស្ករត្នោតមានពណ៌ ស ល្អ។

បន្ទាប់មកស្ករត្នោតដែលកូរវឹករួចហើយ ត្រូវបានលោក ម៉ិ ឡូ និងភរិយា ដួសដាក់នៅក្នុងពុម្ពស្លឹកត្នោត ដើម្បីផលិតជាស្ករផែន។ ការចាក់ផែនស្ករនេះ ធ្វើឡើងដោយប្រញាប់រួសរាន់ បើពុំដូច្នេះទេ ស្ករក្នុងខ្ទះនឹងកក ចាក់ជាផែនលែងកើត។

ផលិតផលស្ករត្នោតរបស់លោក ម៉ិ ឡូ មាន៣ប្រភេទ គឺស្ករផែន ស្ករម្សៅ និងស្ករត្នោតខាប់។ ស្ករត្នោតទាំងនេះ មានដាក់លក់សម្រាប់ភ្ញៀវទេសចរ អ្នកប្រើប្រាស់ និង អ្នកយកទៅលក់បន្តទៀត។

ចុចទស្សនាវីដេអូជាច្រើនទៀត ខាងក្រោមនេះ៖